உனது திமிரும் எனது போதாமையும்

ஒட்டடை படிந்துவிட்ட

உருவுகளுக்குள்

உறங்கிக்கொண்டிருகிறோம்

இருவரும்

இருவரின் கையிலும்

பளிச்சிடுகிறது கொலைவாள்

நம்மில்

யாரேனும் ஒருவர்

கொலையாகும் சாத்தியத்துடனே தான்

நீடிக்கிறது

நமதிந்த உறவு

இப்படி ஏன் 

நீடிக்க வேண்டும் இது

கொடுங்கசப்புடன் நீ

என்னை எதிர்கொள்ளும்போதெல்லாம்

உடைகளுக்குள்

உடைந்து சிதறுகிறேன்

உன் சொல்லுக்கு கீழ்படியும்

என்னை

உன்  விருப்பத்திற்கு வளைத்திருக்கிறாய்

படுக்கையில்

எனதுடல் நோக்கி நீளும் உன் கரங்களை

நான் தட்டியதே இல்லை

என் நிர்வாணம்

உனக்கொரு  பொம்மை மட்டுமே

இணைந்திருக்கக்கூடாத இருவர்

இணைந்திருக்கிறோம்

என்னை பற்றிய

உனது அனுமானங்களோடு

நீ தனியே விலக  யோசிப்பதில்லை

ஏனெனில்

உன் அதிகாரத்தை

செலுத்த

எப்போதும் உனக்கொரு

உடல் தேவை

அது என்னுடையதாய் போனது தான்

துரதிர்ஷ்டம்

வெளுத்துவிட்ட வானத்தில்

ஒற்றையாய் சுற்றித்திரியும்

பறவையை பார்க்கையில் எல்லாம்

எச்சில் கூட்டி விழுங்கிக் கொள்வேன்

எனது  சிறகின்மையை நினைத்து