நீயும் உனது தத்துவமும்

நீ நைச்சியமாக
நழுவப்பார்க்கிறாய்
தத்துவத்தின் துணைகொண்டு

தத்துவத்தை
நக்கி நக்கி
விளையாடுவது
உனக்கு விருப்பமாக இருக்கிறது

தத்துவம்
உன் வீட்டு நாய்க்குட்டி என்று
நினைத்து கொள்கிறாய்
தத்துவமும்
அவ்வப்பொழுது
உன்னிடம் அப்படித்தான்
நடந்து கொள்கிறது

தத்துவத்தின்
தாடையை பிடித்து கொஞ்சுகிறாய்
தத்துவமோ
உன் செய்கைக்கேற்ப
சிரித்து வைக்கிறது

தத்துவத்தை பிடித்து
பறவையென
பறக்கவிடுகிறாய்
தத்துவமோ
மீண்டும்
உன்னிடமே
வந்துவிடுகிறது

பொட்டிட்டு பூச்சூடி
அலங்கரிக்கிறாய்
தத்துவத்தை
அதுவும்
புதுப்பெண்னென
உன் முன் தலைகவிழ்ந்து
அமர்ந்திருக்கிறது

உன்னைப்போலத்தான் இருக்கிறது
தத்துவமும்
தத்துவத்தை போலத்தான் இருக்கிறாய்
நீயும்
எனக்கு
இருவரையும் பிடிபடவேயில்லை

தத்துவத்தின் கால்கள்
உன்னுடைய கருணை
இரண்டும்
என்னிடம் சிக்குவதேயில்லை

தத்துவமும் நீயும்
எனக்கு ஆகாதவர்களானதில்
வியப்பொன்றுமில்லை
இருவரின் வாயும்
நீட்டி முழக்குவது
உண்மையையல்ல
சமயத்தில்
உண்மையை போன்றதொரு பொய்யை